De Hollander

Now hebben al drie meensken tegen me zegd dat d’r halverwege ankem weke een sni’jstorm en wel 20 cm. sni’j kommen zal. Waor haelen ze die wieshied weg? Mar goed, veur de wissighied he’k vandemorgen een flut bosschoppen insleugen. Laot die sni’jstorm dan mar kommen. Doe ‘k weer thuuskwam van de supermark heurde ‘k een specht in de bos roffelen. Krek as et gakken van overkommende wilde gaanzen vien ik dat een prachtig netuurgeluud.

Ik hebbe de Waddenthriller De Hollander van Mathijs Deen lezen. Wat een mooi boek! En et speult in een bekend gebied. Een Nederlaans petroelieschip vint een verdronken wadloper op ‘e zaandplaete De Hond. Ze nemen de man mit naor Delfziel. Et is niet percies dudelik as hi’j now in Nederlaand of in Duutslaand vunnen is. De Bundespolizei uut Cuxhaven stuurt stiekem een rechercheur naor Delfziel om de boel te onderzuken. Zien Duutse kollega’s numen de eigenzinnige rechercheur De Hollander. Et is Liewe Cupido, Duutser van geboorte mar opgruuid op Texel. Hoe meer as Cupido te weten komt, des te raodselachtiger de dood van de wadloper wodt. Et is vermoedelik gien zuver spullegien.