De hiele dag onderweg

Aj’ allienig binnen moej’ alles ok zoe’n betien allienig beredderen, dat ik was zowat de hiele dag onderweg. Om goed negen ure wa’k vandemorgen al bi’j Jarmo, daor he’k een koppien drinken had. Hi’j het een ni’j batteri’jgien in et ding zet daor ik de geragedeure mit losklikken kan. Butendat hadde hi’j een ding veur me besteld daor een hiele protte passies in kunnen. Et ding dat ik hadde, hadde zien beste tied had. Ik wus niet waor aj’ zoks nog kriegen konnen, mar hi’j klikte laestdaegs even wat mit de tillefoon omme en doe was et al besteld en betaeld bi’j Amazon. Dat vanuut Italie is et in Wolvege terechtekommen en ik bin d’r bliede mit. Honderd meter veerderop he’k me vervolgens een ure in et zwiet warkt bi’j fysiosport. En doe bin ‘k naor kapster Bertha in Et Vene west. Ik komme al meer as dattig jaor bi’j heur en al de jaoren deur hawwe et nooit eerder ofzegd vanwege de hitte. En now twie keer aachter mekeer. De eerste keer zol et 37 graoden wodden op ‘e dag da’k naor heur toe zol en vleden vri’jdag wodde et 36 graoden. En dat was heur en mi’j vusen te hiete. We kregen eerst een koppien thee mit een erebeiebakke. Dat is dus een beschuut mit erebeien. Vervolgens het ze goed een ure wark had om me weer wat toonber te maeken. Hoe oolder a’k wor des te meer tied zoks kost. Totdat d’r een ogenblik komt dat d’r niks fesoenliks meer van te maeken is. Mar zoveer is et nog niet. We hebben doe een lekkere kop gruuntesoep had en een croque madame. En doe nog een koppien thee mit een Turks koekien mit een vulling van daodels. Nao Et Vene bin ‘k naor Wolvege gaon. Ik hebbe een boek weerommebrocht naor de biebeltheek en een boek besteld. En doe de supermark nog. D’r was een protte spul in de reklame dat me wel goed uutkwam, dat zodoende ha’k 18,88 euro veurdiel. Een veurdielige dag! Mar… onderschat dat supermarkvolk niet, dat bin gehaaide bliksems. Misschien zatten d’r now wel twie manderijnen minder in et nettien en wat minder brokkies in de pakken Whiskas. Ik achte ze overal toe in staot. Ze daenken grif in et eerste plak an heur eigen pottemenee as an die van de klaant. Een meens wodt wantrouwig in disse malle wereld, mar et vuult toch as een veurdielige dag!