De Hemrik

Vandemiddag he’k een optreden verzorgd mit de Friese zangeresse Grytsje Kingma in et Witte Karkien van De Hemrik. We hadden vanzels wel een betien hinder van et mooie weer… Mar et pebliek dat d’r was, was dikke tevreden. Et volk kwam trouwens overal weg: Drachten, Surhuustervene, Oosterwoolde… D’r weren ok meensken uut Ni’j Beets omdat ik daor een schoffien leden niet kommen kon te vertellen omda’k in et ziekenhuus lag. Dat now kwammen ze naor De Hemrik om naor Grytsje en mi’j te luusteren. Ik hebbe vandemiddag veur de eerste keer wat uut et heufd verteld uut Et liek in de Lende. Eindelik he’k dus ok een stokkien tekst uut dat boek uut et heufd leerd. Dat gong trouwens prima. Ie verkopen d’r drekt ok meer van die boeken deur. Hieronder een foto van et Witte Karkien die ‘k vandemiddag maekt hebbe veur oons optreden daore. Et karkien het gien toren, d’r staot een klokkestoel bi’j.