Johan Veenstra
Stellingwarver schriever en verteller

De fermisten

Plaetst op 28 jannewaori 2023.

Ik hebbe de spannende roman De fermisten van Klaas Jansma lezen. Ik kenne Klaas vanzels van zien radioverslaegen van et skûtsjesylen, tegere mit Sippie Tigchelaar. Al gebeurde d’r ok zowat niks op et waeter, Klaas maekte et raozend spannend. Hi’j het ok jaoren boeken bespreuken in et pergramme van Sippie. Zo het hi’j mien autobiografische roman Een brogge van glas in 2006 ok bespreuken. Hi’j nuumde dat doe een riek boek. Ik hadde nog nooit een boek van him lezen, mar now dus wel. Ik hebbe De fermisten mit genoegen lezen. Ik bin now ienkeer gek op spannende boeken. Tiedens een tillefoontien mit zien (geheime) kammeraodske Froukje Tilma verdwient schoeledirekteur Jouke de Vries zomar inienend. D’r wodt overal naor him zocht, mar hi’j is daegenlaank niet te vienen. Jouke is trouwens niet de ienige die verdwient. Dit is een roman over verslaving an drugs, liefde, onmacht, schuld en boete doen. D’r zitten autobiografische elementen in et boek, mar de lezer moet die mar geweer zien te wodden.