De duisternis tussen ons

Morgen mag ik weer as verhaelevertelder op pad. Ik hoeve et disse keer gelokkig nog niet allienig te vertonen, mar mag mit aanderen optreden. Et betekent wel da’k de laeste weke weer goed oefend hebbe om de verhaelen die ‘k vertellen gao weer uut et heufd vertellen te kunnen. Ik hope mar dat et goed gaon zal.

Ik hebbe de Zweedse thriller De duisternis tussen ons van Rolf & Molly Börjlind lezen. Een mooi boek mit een verrassend slot. Tiedens een wienderige weke in oktober komt de 25-jaorige Emma op bezuuk bi’j heur oolden in de archipel van Stockholm. Ze wil weten wat d’r echt gebeurde mit heur breurtien Robin, die verdween doe ze nog klein weren. Hi’j zol verdronken wezen, mar zien lichem is nooit vunnen en ze mist him nog altied. Om veerder te kunnen mit et leven het ze dudelikhied neudig, mar heur oolden willen heur niks vertellen. In een vuurtoren vlakbi’j heur huus woont een bejaorde keunstener. As ze in zien studio is, zicht ze inienend een schilderi’je van twie speulende kiender. Een petret van Robin en heurzels, dat schilderd wodde in de zoemer dat heur breurtien verdween…