De duiker

Eerder dit jaor las ik De Hollander van Mathijs Deen en now he’k De duiker lezen. Ik vien dat de man prachtige Waddenthrillers schrift. De plakken bin nog wel es hiel herkenber, want ze speulen in et Waddengebied en op ‘e Waddeneilanen van Nederlaand, Duutslaand en Denemarken. Heufdpersoon is rechercheur Liewe Cupido die oorspronkelik van Texel komt, zien moeder woont daor nog, mar al jaoren bi’j de Duutse pelisie warkt. Hi’j het zien hond Vos altied bi’j him. In dit boek wodt et wrak van de Hanne ontdekt, een klein vrachtschip dat in 1950 in een zuudwester storm vergong en veur een miljoen euro an keuper an boord bliekt te hebben. In et wrak wodt et lichem van een duker van et eilaand Föhr ontdekt. Hi’j was vermoedelik doende en steel et keuper, mar hi’j bliekt vermoord te wezen. Hi’j is mit haandboeien vaastebunnen en stikt doe zien zoerstof opraekte. Wie het et daon? Et onderzuuk brengt rechercheur Cupido bi’j een duukklub op Terschelling. Hoe dichter hi’j de daoder op et spoor komt, des te meer hi’j verstrikt raekt in vieze zaekies…