De drone

Vandemorgen het Anke hier de hutte weer opredded en ze ontdekte moezekeutelties in et aachterhuus. En doe heurde ‘k heur inienend gillen… D’r was een levendige moes die van aachter de vriezer aachter de wasmesiene roetste. D’r was vanzels mar iene verantwoordelik veur et feit dat daor een moes was. Mien alderliefste poes Marja. Mar die dee krek as wus hi’j nargens van en lag laankuut op ‘e baank te soezen. Wanneer as die moes daor kommen is? Zeg et mar. Misschien al wel doe ik in et ziekenhuus lag. Ik hebbe vandaege de hiele dag de aachterdeure wiedewaegen losstaon had, dat ik neme an dat de moes intied wel votgaon is. De wiede wereld in.

Ik hebbe de literaire thriller De drone van Unni Lindell lezen. Een mooi en spannend boek. In een verlaoten militair kamp staot een man die een drone over de bos vliegen lat. Hi’j filmt de omgeving. As de drone over een eupen plak in de bos vligt, zicht hi’j op et scharm inienend een tente mit een vrouw die daor allienig liekt te wezen. Wet die vrouw wel dat ze heur tente opzet het op et plak daor vuuf jaor leden een vrouw gruwelik vermoord is? Nao een ongelok, aanderhalf jaor leden, is pelisieagente Marian Dahle weer hielemaole an et wark. En ze wodt votdaolik op een moordzaeke zet. Op een eupen plak in de bos is een dooie vrouw in een tente vunnen…