De Buitenplaats

Ik hebbe gister een mooie vertelaovend in Opaende had. Ik hadde van teveuren flink rippeteerd, dat de verhaelen kwammen d’r zomar uut. Nog altied heerlik wark. Verschillende vrouwluden wussen nog wel da’k in 1994 ok bi’j heur west was. Ze zeden drekt da’k mien moeder doe bi’j me hadde. Dat was zo. In die tied duste mien moeder niet meer allienig te wezen. Dat was een drege tied. Ze gong dan in ieder geval ien keer in de weke mit me mit a’k argens henne mos te vertellen. En veerder kwam d’r elke weke een keer een oppas en ik brocht heur naor femilie of goeie kunde. Ik hebbe gisteraovend mar een peer verhaelen over heur verteld, zodoende was ze in wezen weer mit me mit naor Opaende. Mar now goed 31 jaor laeter in de tied… De weerommereize was een betien vervelend, et was hier en daor nogal mistig. Mar ik bin vcilig thuuskommen nao een prachtige aovend.

We hadden vandaege aenlik naor een dierepark zuld, mar mit et regenachtige weer is dat niet deurgaon. We bin in plak daorvan naor Museum De Buitenplaats in Eelde west. Daor hewwe eerst wat drinken en lekker gebak had in brasserie Roling. En doe hewwe The Mucha Experience bekeken. Alphonse Mucha (1860-1939) maekte indertied prachtige affiches en ofbeeldings in art nouveau-stijl. Zien wark was in een 3D prissentaosie te zien. Ie wodden d’r as et waore in mitzeugen. Et was een overweldigende gebeurtenis om te ondergaon. We zwurven in de mooiste kleuren en mit mooie meziek mit Mucha mit deur zien Tsjechische geschiedenis. In de mooie tuun van De Buitenplaats staot et 17^de ieuwse Nijsingh Huus. Dat hewwe ok bekeken. Hiel mooi! Vervolgens biwwe naor et vliegveld reden en vlak veur de ingang en de vertrek- en ankomsthal langesreden. Ik was daor nog nooit west. Even hewwe overweugen en stap daor in een vliegtuug en kom veureerst niet weeromme. Mar dat kon vanzels niet om poes…We hebben vanaovend eten in resteraant Boszicht in Ni’jberkoop. Et was gien mooi weer om foto’s te maeken, mar hieronder toch twieje. Boven: Museum De Buitenplaats. Onder: de oranjerie van et Nijsingh Huus.