De brief

Vandemorgen he’k even op vesite west bi’j Dicky in De Flecke op ‘e Jouwer. We hebben genoeglik een half ure praot. Harry en heur dochter weren d’r ok. We willen allemaole as we oolder wodden graeg thuus blieven, mar soms kan dat niet. Dat is verschrikkelik, mar et is goed dat d’r dan huzen as De Flecke binnen.

Ik hebbe de roman De brief van Kathryn Hughes lezen. Wat een mooi, spannend en ontroerend verhael! Et boek begint in 1973. Tina Craig perbeert zovule meugelik geld te verdienen, zodat ze bi’j heur gewelddaodige man weggaon.kan. Ze warkt in een kringloopwinkel en daor vint ze in de buse van een twiedehaans jassien een brief in een verzegeld en niet frankeerd kevot. Tina maekt et kevot los en lest de brief. Deur et lezen van de brief zal heur leven  veurgoed veraanderen. Mar dat wet ze dan nog niet. En dan springt et verhael weeromme in de tied. Et is 1939, vlak veurdat de oorlog begint, en Billy Stirling beseft dat hi’j him as een idioot gedreugen het. Hi’j perbeert et weer goed te maeken mit Chrissie en schrift een brief…