De brief

De geleerden vienen da’k flink in beweging blieven moet. Ik gao daoromme niet mit de auto om bosschoppen te doen, mar doe alles op ‘e fiets. Dan moej’ vaeker, want in de fietstassen kan niet hiel arg vule. Vandemiddag he’k naor Wolvege west en bi’j de Lende langes bin ‘k mit twie volle fietstassen weeromme naor huus fietst. In Wolvege stopte een man bi’j me en die vreug me as ik Johan Veenstra was. Ja! En ik hadde boeken uutgeven. Ja! Doe gaf hi’j me een stok pepier, dat mos ik drekt lezen. D’r ston in dat zien boek veur jongen van een jaor of tiene now klaor was. En as zokke jongen zien boek lezen hadden, zollen ze weten: God is de natuur, God is het weer, God is zuurstof, God is alles, God is veel meer. Zo ston et mit grote letters op dat stok pepier. En doe wol hi’j een tip van mi’j hebben. Hoe mos hi’j zien manuskript uutgeven kriegen? Hi’j kon niet mit een komputer overweg, mar zien zeune wel. Die wol ok wel bi’j me kommen om advies. Ik hebbe as advies geven dat zien zeune op ‘e komputer intikken moet: Hoe kan ik mien boek uutgeven? En dan kommen grif Bookscout en zo in beeld. Iederiene kan tegenwoordig zien eigen boeken uutgeven. Aj’ d’r mar veur betaelen willen.

Tiedens oonze midweke in Exloo heb ik een prachtig boek lezen: de roman De brief van Kathryn Hughes. Eerst kon ze d’r gien uutgever veur vienen. Gieniene wol heur manuskript hebben. Totdat ze eindelik argens onderdak kreeg. En doe wodde et boek een internationaole bestseller! Dat zal die man in Wolvege grif niet overkommen. De roman gaot over Tina Craig. Die warkt zo hadde as ze mar kan om geld te hebben en dan bi’j heur man weggaon te kunnen, want die mishaandelt heur algedurig. Tiedens heur wark in een kringloopwinkel vint ze in de buse van een twiedehaans jasse een kevot. Ze lest de brief die d’r in zit. Heur leven zal dan veur altied veraanderen. Ik hebbe et boek in iene goeze uutlezen!