De baptisten

Vandemiddag he’k even naor Wolvege west op ‘e fiets om nog wat bosschoppen te doen. Ik kreeg ok nog et verzuuk om een gedicht te schrieven. Ik hebbe daor nog gien ja op zegd. Ik zal d’r over naodaenken en ze zullen me maendag nog een keer bellen. En now pak ik aanst de tasse in, want ik bin een dag of wat van de polle.

Ik hebbe de roman De baptisten van Nyk de Vries lezen. Et boek wodde op 3 meie prissenteerd in boekhaandel Burgum. Et is echt een prachtig boek. Et gaot over twie kammeraoden, Marten en Wytse, die in een Fries dörp van boeren en arbeiders wonen. Dat is Noordburgum. Ze kennen mekeer van de schoele en de karke. Mit een peer aandere jongen richten ze een band op. Ze kriegen sukses en toch ontstaon d’r nao verloop van tied scheurties in heur kammeraodschop en drieven ze bi’j mekaander weg. De baptisten is een prachtige coming-of-ageroman over vrundschop, geleuf, verlös en et magische gevuul van meziek maeken mit mekaander. Extra mooi is dat et hier niet veer uut de buurt speult. As Marten mit iene op een meer bi’j Oostermeer oftewel Eastermar veert, weet ik percies waor dat is. Wi’j veren wel es van Burgum over et Burgumermeer naor Oostermeer en dan de Leyen op. Ik zag et allemaole veur me. Nyk schrift prachtig over de tied van zien jeugd en over et leven in dat dörp. In de verantwoording schrift hi’j dat et een fiktief verhael is. Mar desondaanks is alles waor, zo waor as et woord wezen kan. Lees dit boek!