De Alderhoogste

Vandaege bin ‘k weer van 1 tot 6 ure naor Berkoop west veur de Eupen Stal. Dat is wel goed gaon, mar ik bin now wel een betien mu. Gister was trouwens de topdag van de verkope tot now an toe. Naodat ik gister om kwat over 4 naor huus gaon bin, het Gerrie allienig ok nog mooi wat verkocht. Veur een maendag he’k vandaege ok goed verkocht. Ik kreeg de bekende Friese zanger Roel Slofstra en zien vrund Frits uut Ried bi’j me. Ze vertelden dat ze altied geneuten van mien kollums in de Liwwadder Kraante en ze hebben een boek van me kocht. Ik hebbe boven op ‘e zoolder nog wel oolde langspeulplaeten van Roel liggen. Ze vertelden ok dat ze allebeide in Drenthe geboren binnen. Et bin dus aenlik Saksen, krek as ik bin. Ik mos doe drekt daenken an wat Rients Gratama altied zee: Friezen bin gewoon Drenten die te veer deurlopen binnen. Vervolgens vertelde een man me dat hi’j me gister op ‘e fiets zien hadde bi’j de Driewegsluus. Dat kan dus niet, dat het iene aanders west. Lichtkaans een dubbelganger. Zokke aenden fiets ik nog niet. Een vrouw uut Liwwadden vertelde me even laeter dat d’r mar Iene is die over alles gaot. En doe wees ze naor boven. De Alderhoogste dus. Die hadde ze hiel goed kennen leerd. Zoks is mooi, mar ik geleuve niet in de Alderhoogste. Dat he’k ok zegd. Dat vun ze verschrikkelik. Wat miste ik dan wat en ze gunde me zoks zo toe. Dat is vanzels ok mooi, mar misschien mist zi’j wel van alles wat ik dan wel weer hebbe. Dat he’k ok zegd. Om een verhael kot te maeken he’k doe ok nog mar zegd dawwe mekeer allemaole in zien weerde laoten moeten. En doe wawwe et zomar iens en biwwe as vrunden uut mekeer gaon. Op ‘e Eupen Stal liggen de verhaelen veur et opscheppen.