Dattig jaor

Et was vandemorgen al weer wit over et laand en d’r zat een spannegien grune musken (groenlingen) bi’j et voer. Butendat wun Xandra Velzeboer al weer goold. Mar et was vandaege veural 16 feberwaori, et was vandaege veural dattig jaor leden dat mien moeder heur laeste verjaordag vierde. Tiny en Annie kwammen van De Hoeve bi’j heur om heur te fielseteren. Tiny was een tantezegger en Annie paste ien keer in de weke op mien moeder omdat ze niet allienig duste te wezen en ik in die tied drie keer in de weke vot mos te vertellen. Tiny is d’r ok al lange niet meer, Annie woont weer in de Aachterhoeke daor ze wegkwam. We sturen mekeer altied nog ni’jjaorskaorten. Alles is dit jaor dattig jaor leden. Dat ze jaorig was en dat ze op 9 meert naor et ziekenhuus gong. Een dag naodat de ni’je Baank van Bercoop eupend was mit een optreden van Rients Gratama, Carry Tefsen en mi’j. We voerden een stokkien op dat Rients schreven hadde en ieder praotte zien eigen tael. Zwaantje paste die dag op mien moeder. Aanderedaegs gong ze dus naor et ziekenhuus en van daoruut op 10 april naor et verpleeghuus in Wolvege. Die daotums staon allemaole in mien agenda van et jaor 1996 die op ‘e zoolder ligt. Ik kenne die daotums trouwens wel uut et heufd. Percies een half jaor nao heur verjaordag raekte ze op 16 juli weg. In die oolde agenda staot: Mamme is vandaege om kwat over zeuven aovens wegraekt. Et vuult allemaole as de dag van gister en toegeliekertied al zolange leden. Hieronder een foto daor we tegere op staon. De foto is neumen op 5 september 1992. Mit een reisien van de Stellingwarver Schrieversronte wawwe in Dwasgrachte.