DAN

Vandemiddag moch ik et eerste exemplaor in ontvangst nemen van et boek Noordwolde (on)herkenbaar veranderd. Et boek is uutgeven deur de DAN, Stichting Dorpsarchief Noordwolde. Et is een jubileumuutgifte, want de DAN bestaot 25 jaor. In et boek staon foto’s van vroeger in Noordwoolde en op etzelde plak bin foto’s maekt van hoe as et d’r now bi’jligt. Hiel mooi. Kultuurwethoolder Roelof Theun Hoen van West-Stellingwarf het een veurwoord in et boek schreven. Ik kreeg et eerste exemplaor omdat mien stichting, de JVS, geld geven het om et uutgeven van et boek meugelik te maeken. Et was vandaege de Sneupersdag van de DAN in et Buurthuus. D’r was een protte volk. Ik kreeg et boek van Harry Komduur, de veurzitter van de DAN. Ik kenne Harry! Ik warkte vroeger bi’j de belastingdienst, zien vader warkte d’r ok en Harry het daor ok een jaormennig warkt. Uut die tied ken ik him al. En doe veraanderde hi’j van baene en hewwe mekeer meer as 40 jaor niet zien. Tot 2018 an toe. Doe verkocht ik tiedens Eupen Stal in Berkoop mien ni’je boek Vroeger is veurgoed veurbi’j en doe kwam d’r een man mit een hoed op de deure in. En dat was Harry. Ik bin now goed bevrund mit him en Frans. Jammer genoeg gaon ze ankem jaor verhuzen naor heur huus op Texel. Dat spiet mi’j en dat spiet de DAN! Praktisch et hiele JVS-bestuur was vandemiddag in Noordwoolde. Allienig Jan Berend kon niet, die mos warken. Et was een aldergenoeglikste middag. We hebben daor ok nog even an een taofeltien zeten om wat JVS-dinkies te bepraoten. Een mini-vergeerdering in Noordwoolde! We bin bliede dawwe financieel wat betekenen kunnen veur zokke blinders mooie projekten.