Dag mit een goolden raantien

Ik bin vandaege naor mien Fryske freon Douwe (Kootstra) west in Veenwoolden en we hebben een prachtdag had mit et mooiste weer waj’ je mar indaenken kunnen. Ik was om even nao half 11 bi’j Douwe te plak. We hebben daor eerst wat drinken had. Jelma Knol kwam ok nog langes, die ken ik vanzels uut de Friese literaire wereld. Even laeter kwam Romkje thuus. Douwe en ik bin in mien auto over mooie binnenweggies naor Burdaard reden. Daor hewwe wat eten en dronken op et terras van resteraant It Posthûs an de Dokkumer Ee. Et zit daor prachtig. We bin daor ok wel es mit de boot west. Nao et eten biwwe naor et restereerde Ruurd Wiersma Museum west. Jaoren leden biwwe daor ok al es west. Et is prachtig opknapt. Wiersma was een naïve schilder die mooie schilderi’jen maekte over de jaorgetieden, Burdaard en verhaelen uut de biebel. D’r hangen tal van schilderi’jen en alle muren van zien woonkaemer het hi’j beschilderd. De schilder hadde ooit verkering mit een aorig maegien. Mar de iene was hervormd en de aander geriffermeerd. De karkeraod het et maegien naor Den Haag stuurd daor ze een warkhuus kreeg. Zo gong dat! Wiersma het nooit meer een stap in de karke zet. Mar ze hebben mekaander dus nooit weer zien… Romkje was daor vandaege de rondleidster en vertelde d’r prachtig over. Zo gaot alles beter veur je leven, mit de verhaelen d’r bi’j. We bin doe in de auto weerommegaon naor Veenwoolden en daor op ‘e fiets stapt en via mooie fietspaeden naor Jistrum gaon. Daor biwwe op vesite west bi’j aktrice en verhaelevertelster Hilly Harms. Zi’j was op Eupen Stal west doe ik in et ziekenhuus lag en het doe van Fettje Et liek in de Lende kocht. Ze zat d’r in te lezen en vun et slim spannend. Douwe en ik hebben heur elk een boek van oons geven. We hebben daor gezellig buten zeten te praoten mit een koppien thee en een peer koekies. We hebben verteld over oonze mislokte optredens, want die hewwe alle drieje had.Vervolgens biwwe naor Burgum fietst. Daor hewwe waarm eten had op et terras van resteraant ’t Roodhert. Ik hebbe lekkere zalm had. En doe biwwe weerommefietst naor Veenwoolden, daor hewwe nog even naopraot over disse dag mit een goolden raantien. Hieronder twie foto’s die ‘k vandaege maekt hebbe. Boven: gezicht op ‘e meule van Burdaard. Onder: de aachterkaant van et Ruurd Wiersma Museum.