CV-ketel

Gistermiddag he’k weer naor Marian in Wolvege west veur fysio. Daor gaon we nog wel even mit deur, want de spiereboel dot me vaeke zeer. Doe ‘k weer thuus was he’k een overheerlike frambozekeek bakt.

Vandemorgen he’k een ni’je cv-ketel kregen. Now ja, kregen… Die verhipte dingen kosten omtrent 2.500 euro. De monteur die vleden jaor nog bi’j de oolde keken het, raodde me doe een ni’jen iene an. Et oolde ding was onderdehaand vuuftien jaor oold en dat is ok ongeveer de levensduur. De kaans wodde dus groter dat d’r mankementen kommen zollen en butendat hadde de regering beslist dat d’r vanof 1 jannewaori 2026 gien cv-ketels meer verkocht wodden mochten. Alleman mos dan een waarmtepompe anschaffen. Daor ha’k hielemaole gien belang bi’j, want ie heuren daor niet altied positieve berichten over. Zodoende heb ik vandaege een ni’je cv-ketel kregen. De man uut Berkoop van Energie Service Frieslaand hadde et in een ure of wat fikst. Ik kan now weer vuuftien jaor veuruut en verwaachte dat disse ketel me mit et grootste gemak overleeft. Aachterof bekeken hadde et eins nog niet hoefd, want de regering die we now kriegen het die daotum van 1 jannewaori 2026 weer valen laoten. Een lekker jojo-beleid. Mar goed, ik bin bliede da’k dat ni’je ding hebbe.