Corona

Corona blift de boel in de warre schoppen. Ik hadde gistermiddag vertellen zuld in Broeksterwoolde, mar et wodde oflast en eerst veur een jaor uutsteld. In dat dörp bin bliekber een protte besmettings en ok (bestuurs)leden van de kristelike plattelaansvrouwluden daor a’k naor toe zol weren besmet. Jammer. Ik moch in feberwaori vier keer argens optreden, mar d’r is mar iene van de vier keer deurgaon. Zo blift et een vervelend gekwakkel. Mar ik mag vanaovend onverwaachs vertellen in Wolvege veur de leden van de Vrouwen van Nu. Ik wodde daor gister over beld. Degene die ze vanaovend hebben zollen kon niet kommen vanwege… corona. As ik invalen wol. Ik hebbe zegd da’k dat wel wol, mar ik bin al vuuf keer eerder bi’j heur west te vertellen. Ik kon dus allienig mar wat oolde verhaelen, die ‘k daor ooit al es eerder verteld hebbe, wat rippeteren en opfrissen. Mar dat vunnen ze niet arg. Ik hebbe d’r de laeste peer jaor vanzels gien rippertoire bi’jleerd. Dat hadde gien zin. Ik zal vanaovend ok vertellen over en uut mien laeste twie romans Vroeger is veurgoed veurbi’j en Et liek in de Lende. Dat he’k daor nog niet eerder daon. Mar ja, lichtkaans dat verschillenden die boeken al lezen hebben. Dat is dan niet aanders. We moe’n in disse tied roeien mit de riemen die we hebben.

Ik hebbe vandemiddag naor de huldiging van oonze Olympiërs keken. Hiel mooi! Nederlaand het et best daon in Peking. We stonnen zesde in de medalliespiegel mit zeuventien medallies: achte van goold, vufe van zulver en viere van broons. Dat is liekewel toch drieje minder as vier jaor leden in Pyeongchang. Doe ston Oranje vuufde in de medalliespiegel mit twintig medallies: achte van goold, zesse van zulver en zesse van broons.