Claus

Ik hebbe vandaege een fietstochien van 30 kilemeter maekt. Et was heerlik weer, de temperetuur leup op naor 22 graoden. Ik bin eerst naor et Victoriapark in Wolvege fietst, daor was de All Car Meet die jaorliks orgeniseerd wodt deur mien komputerkammeraod Jarmo. Et was d’r vreselik drok. D’r stonnen honderden, ok oolde en appatte, auto’s die een protte belangstelling trokken. Et ree of en an. Ik hebbe een kuier maekt tussen al die auto’s en standhoolders deur en was van doel en neem daor een brotien hamburger. Mar d’r stonnen me te vule meensken te waachten. Dat ik bin Wolvege in gaon om wat bosschoppen te doen en doe he’k op et terras van De Stoof wat drinken en een twaelfuurtien had. Ik bin doe deurfietst tot vlak onder Et Vene. Bi’j de Kuunder langes bin ‘k naor Mildam fietst en doe deur de Mildamster Poolder en bi’j de Scheene langes weer naor huus toe.

Et is vandaege percies honderd jaor leden dat Claus von Amsberg geboren wodde in Hitzacker. In 1965 verloofde hi’j him mit Beatrix en ze trouwden op 10 meert 1966. Raus Claus kalkten meensken op ‘e muren en op heur trouwdag ontplofte d’r tiedens de rondrit in de Goolden Koetse een rookbom. De grootste raosbekken hebben meerstal ongeliek. Claus was een sympathieke en integere man. Zien vrouw en twie zeunen weren vandaege in Hitzacker op ‘e Prinz-Claus-Promenade die in 2014 deur Beatrix eupend wodde. Wi’j weren op 15 juni 2016, dit jaor tien jaor leden, op die Promenade. We hebben twie naachten in een hotel in Hitzacker slaopen en et stattien en de omgeving bekeken. Oons hotel ston op een hoogte en van daor koj’ over de Elbe hennekieken. Dat was ooit de greens tussen vri’jhied en onderdrokking. Ik hebbe d’r twie gedichten over schreven, Elbe 1 en Elbe 2. Ze staon in mien bundel De overkaant van et waeter. Et Nedersaksische taelgebied lopt tot an de Elbe. Tal van opschriften daor in et Platduuts weren makkelik te lezen. Die herinnerings kommen vandaege weer boven. Hieronder twie foto’s die ‘k daor doe maekt hebbe. Boven: de Prinz-Claus-Promenade. Onder: in dit hotel sleupen we. We atten in een resteraant dat d’r schieve tegenover ston.