Cees Nooteboom

Gister kwam et ni’js dat Cees Nooteboom uut de tied raekt was. Een geweldige schriever die in et butenlaand, en dan veural in Duutslaand, haost nog bekender was as in Nederlaand. De man die et reisverhael tot een literair genre maekte. Hi’j is 92 jaor wodden. Ik hebbe in de negentiger jaoren een verhael van him vertaeld in et Stellingwarfs. Dat was een fragment uut et grote heufdstok Taal van beelden uut et boek De wereld een reiziger. Een onthutsend verhael over de ondergang van tael en kultuur van et Washo-volk. De Washo bin inwisselber veur de Stellingwarvers. Oonze tael brokkelt ok almar veerder of. Die bewuste vertaeling het eerst in et Stellingwarver tiedschrift De Ovend staon en is laeter opneumen in mien boek Verrassend Stellingwarfs. In dat boek staon vertaelings van mi’j van verhaelen van 12 bekende Nederlaanse schrievers. Et wodde uutgeven in 1998 in verbaand mit et 100-jaorig bestaon van boekhaandel Zwikstra in Wolvege. Mar eerder ston de vertaeling van Nooteboom zien verhael dus in De Ovend. Ik hebbe him doe vanzels om toestemming vraogd en kreeg een mooi briefien van him weeromme. Dat beweer ik in De wereld een reiziger dat in mien boekekaaste staot. Et briefien ligt op ‘e bladziede daor et oorspronkelike verhael begint. Zo he’k in tal van boeken mooie briefies en kaorten zitten. As de meensken laeter, nao mien wegraeken, de hiele boel zomar votsmieten, smieten ze een hieleboel mooie dingen mit vot. Hieronder staot et briefien dat Cees Nooteboom me stuurde. Et is dateerd op 1 meie 1994. Hi’j schreef et vanuut zien huus in Amsterdam. Op et briefpepier staon ok adressen van him op Menorca en in Berlien. Nooteboom hadde meerdere huzen in meerdere lanen. Misschien  kuj’m et briefien hieronder wel lezen. Ik hadde him indertied een exemplaor van De Ovend mitstuurd en dat het hi’j goed lezen. Hi’j schrift temeensen dat hi’j now wet dat ‘weggeraakt’ en ‘weg’ dood betekent. En hi’j vint een gedicht van de Griekse dichter Kafavis, ok in een Stellingwarver vertaeling, prachtig. Now hi’j d’r niet meer is, za’k de boeken die ‘k van him hebbe nog es weer lezen gaon.