CBB-luusterboek

Ik hebbe vandemiddag, ondaanks dat d’r flink wiend ston, toch mar even op ‘e fiets naor Wolvege west om wat bosschoppen. Ik moet in beweging blieven, aanders komt et niet goed.

De CBB in Ermelo zorgt d’r veur dat d’r luusterboeken kommen veur meensken mit een leesbeparking. In Sneek is ok een studio van diezelde CBB. In et verleden het Klasien daor verschillende boeken van mi’j inlezen. Mar now za’k et zels ok es een keer doen. Et Kedoboek van de Friese Boekeweke Seis Ses Zesse Ses zal ok een luusterboek van maekt wodden. Ze vunnen et een mooi idee dat de zes schrievers zels heur eigen verhael inlezen zollen. Dat moet in oktober gebeuren. Et Kedoboek komt uut op et Boekefeest in Tresoar op 30 oktober. Ik hebbe gister alvast een keer oefend. Mien verhael Parredies telt 4556 woorden. Ik hebbe et in een half ure oplezen en een stok of tien versprekings maekt. Dat is al hiel goed, mar et moet beter. Et is om de dooie dood niet makkelik en lees zoe’n lappe tekst zonder versprekings. Dat lokt gien meenske. De Troonrede van dit jaor telde 2894 woorden. Hoevaeke zol W.A. thuus hadde-op oefend hebben? Meer as ien keer, gao daor mar vanuut. Et liekt me in zien geval slimme griezelig. Iederiene kikt mit, ie meugen je niet al te vaeke verspreken. Ik zol hatstikke benauwd wezen da’k die pepiereboel valen laoten zol. Ik zol daor echt mit bibberende hanen zitten. Toch vien ik dit een mooie uutdaeging om zo weinig meugelik versprekings te maeken. Ik kan et best wel goed, al zeg ik et zels. De vrouw van de CBB in Sneek docht dat ik wel in et zoolt bebeten was wat dit anbelangt. Dat is ok zo. Jaorenlaank he’k mien stiekelstokkies veurlezen veur de radio. En et is in december twintig jaor leden da’k in de studio van Omroep Frieslaand in vier keer de komplete roman Een brogge van glas inlezen hebbe. Dat was best wel even een klus. Et boek is al lange uutverkocht, mar d’r bin veur de liefhebbers nog wel een peer luusterboeken van Een brogge van glas te koop. Ik zal mien verhael Parredies hier thuus nog wel een peer keer oplezen veurda’k in oktober naor de studio zal. Mar es zien hoevaeke a’k dan argens stoeken blieve. En dan rustig blieven, even waachten, en de betreffende zin opni’j rustig oplezen. Et verkeerde stokkien wodt d’r dan wel uutknipt.