Johan Veenstra
Stellingwarver schriever en verteller

Callaansoge

Plaetst op 20 meie 2022.

Ik was vandemorgen om tien ure al op ‘e Harkema bi’j Saakje. Ik hebbe daor eerst wat drinken en een plakkien keek had en doe hewwe oons jaorlikse reisien naor Callaansoge maekt. Eerst was de zunne d’r nog lekker bi’j, mar dat veraanderde op ‘e Ofsluutdiek al. De zunne raekte vot en kwam pas weeromme doe ‘k zokrek van De Harkema naor huus ree. Mar et was eerst wel lekker weer, een graod of achttien. Dat ik kon lekker in de kotte broek lopen. Wel mit een jakkien an, mar toch… We bin eerst naor straandpaviljoen De Strandtent gaon en daor hewwe lekker eten en drinken had. De vrouw van de bediening hadde een shirtien an mit de volgende tekst op ‘e rogge: Happiness is the sand between my toes and the sunburn on my nose. Vervolgens hewwe een heerlike straandkuier maekt. Dat vien ik toch zo mooi! En doe begon et een klein betien te druppen. Doe we weer in et dörp weren, begon et flink te regenen. Bi’j bakker Van der Ploeg he’k bolle en koekies kocht en we hebben in een resteraantien drinken mit een beste hiempe appelgebak had. En doe biwwe weer in de auto stapt. In ’t Zaand he’k in een bloemewinkel een prachtige foksia kocht. Op ‘e Ofsluutdiek raekten we tot twie keer toe in een lange file. En et bleef mar regenen… Bi’j Saakje thuus he’k nog een bod sop en een plakkien bolle had en doe was die mooie dag ok al weer veurbi’j. Et was gien fotoweer, mar ondaanks dat hieronder toch een foto die ‘k vandemiddag maekt hebbe. Gezicht op Callaansoge.