Johan Veenstra
Stellingwarver schriever en verteller
Plaetst op 2 december 2022.
Hiel vaeke is een boek mooier as de verfilming van dat boek. Mar soms bin boek en film allebeide meer as indrokwekkend. Vleden jaor las ik de roman Noem me bij jouw naam. De vertaeling van Call me by your name van André Aciman. Gisteraovend zag ik de verfilming. Haost drie uren laank zat ik spreekwoordelik op et puntien van de stoel. Zo mooi en ontroerend. En wat een fantastisch spel van Timothée Chalamet en Arnie Hammer. De zeuventienjaorige Elio woont mit zien femilie in Noord-Italië. In de zoemer van 1983 trekt de Amerikaanse student Oliver bi’j heur in. De beide jongen wo’n ondaanks et grote leeftiedsverschil verliefd op mekeer en beleven een zoemer vol meziek, lekker eten en romantiek. Totdat Oliver weer naor Amerike moet… Call me by your name is een hatverscheurend drama.
Ik hebbe et grootste pat van de dag an et wark west mit mien ni’je boek. Van de 28 verhaelen he’k vandaege 5 hielemaole bewarkt en verbeterd. Ik hebbe alle opmarkings van de leesgroep d’r in verwarkt. Morgen za’k d’r weer mit an de slag. Hier he’k wel even wark an, mar dat maekt niet uut. As et d’r mar beter deur wodt.