Burgum

Vandemiddag he’k in Burgum bi’j Jannie op vesite west. Nao et begin van corona wa’k d’r niet meer west. Halverwege dit jaor is Jan wegraekt, dat now zit ze allienig. Gelokkig wonen de kiender niet veer uut de buurt. Zo gaot et… Meensken daor aj’ slim omme geven wi’j’ altied wel bi’j je holen, mar daor hoolt de dood gien rekenschop mit. Jan en Jannie kwammen vroeger altied op ‘e koffiekonserten in de karke van Ni’jhooltpae. Daor ken ik ze van, want ik regelde dat indertied mit. We hebben een peer uurties genoeglik praot, Jannie altied in et Bolswarders, en ik hebbe d’r een stokkien gebak van de PLUS had. De PLUS-winkel van Burgum is uutreupen tot de beste PLUS-winkel van et Noorden. Vandaor dat lekkere gebak! Deur donkerte en regen bin ‘k krek weer thuuskommen.

Een schoffien leden kocht ik op een aovend van De Kring van Bercoop mit Wim Daniëls een boek van die bekende man. Op vakantie! Een geschiedenis van oonze vri’je tied. Ik hebbe et mit genoegen lezen. Aj’ wat oolder binnen is et allegeer een feest van herkenning!