Burgum

Ik moet aenlik neudig es bi’j verschillende meensken kieken hoe et mit heur gaot. Mar ja, d’r is altied wel wat. Vandemiddag he’k naor Burgum west. Daor he’k op vesite west bi’j Jannie. Now Jan d’r niet meer is, is ze allienig. Zi’j en Jan kwammen vroeger altied op oonze koffiekonserten in de Nicolaaskarke van Ni’jhooltpae. Ze misten nooit. Dat was een mooie tied. Ik zat hier doe in et bestuur en we hadden de karke aenlik altied vol. Van dat bestuur bin ik de ienige die nog leeft. Jannie en ik hebben genoeglik een peer uurties praot. Ik hebbe d’r drie koppies thee en een kokeskraanze had. Ik praote vanzels altied Stellingwarfs en zi’j Bolswarders. Dat is mooi. Meensken moe’n as et mar even kan heur eigen tael praoten blieven. Dat is goed veur die meensken en veur heur tael. Nao de vesite an Jannie bin ‘k in etzelde Burgum op vesite west bi’j Peter en Janneke, die ken ik ok al jaoren. Ze gaon an et aende van et jaor verhuzen naor Drachten. Ok daor hewwe gezellig een goed ure praot en ik hebbe op ‘e poes ommeaaid. Die vun dat lekker en ikke ok. Ik hebbe bi’j heur ok een koppien thee mit wat lekkers had. Mit een lief vol thee bin ‘k doe om tien over vufe op huus an gaon en dat wodde een rit mit hindernissen. Op ‘e A7 braande argens een auto uut of zo. Dat bi’j Drachten kwam ik in een lange file te staon. Alle op- en ofritten naor en van Drachten stonnen stampvol. Ik bin over Ureterp en Oosterwoolde eindelik toch thuuskommen. Hieronder nog een foto die ‘k vandemiddag in Burgum maekt hebbe. Dit is et beroemde resteraant De Pleats.