Burgemeester en film

Vandemiddag he’k oonze ni’je en tiedelike burgemeester Stieneke van der Graaf op vesite had. We hadden mekeer zien bi’j et ofscheid van oonze veurige burgemeester André van de Nadort en doe gaf ze an dat ze nog es beter mit me in de kunde kommen wol. Dat is vandemiddag dus gebeurd. We hebben een hiel schoft aldergenoeglikst praot. Zi’j over Zwatsluus daor ze wegkomt en ik over mien dörp daor a’k altied woond hebbe en dat et deur de jaoren henne zo veraanderd is. Dat de hiele wereld zo veraanderd is. En netuurlik over de prachtige Stellingwarven. Ik hadde de thee klaor doe ze kwam en een schaoltien mit Nedersaksische koekies: Aachterhoekse keneelbiskwies en Weyertjes, koekies die bakt binnen mit mael dat maeld is deur meule De Weyert in Makkinge. Ze nam trouwens as kedogien alderhaande lekkers veur me mit van een waarme bakker uut Wolvege. En ik hadde ok een kedogien veur heur. Bi’j de Schrieversronte hadden ze een pakkien mit boeken en tiedschriften veur heur klaormaekt. Mien laeste boek, de verhaelebundel Naozoemerlaand, zat d’r ok bi’j in. Ze het oons tegere ok op petret zet. Die foto kriegen jim hier misschien nog wel es een keer te zien.

Op 5 augustus kwam De Tillegraaf al mit et ni’js en vandaege ston et in de Stellingwarver kraanten. Dat now kan ik et ok wel vertellen. De bekende Friese filmmaeker Steven de Jong is van doel om een verhael van mi’j te verfilmen. Hi’j is bekend van zien films De hel van ’63, De Scheepsjongens van Bontekoe, Snuf de hond en nog een hieleboel aandere films. En now wil hi’j dus et verhael Sultan uut de bundel Naozoemerlaand verfilmen. De film komt De Sultan van Berkoop te hieten. Tegere mit Steven en Abel Darwinkel, de direkteur van de Stellingwarver Schrieversronte, he’k de laeste winter al verschillende keren  vergeerderd over dit projekt. Ik hebbe et skript ok schreven. Een hiele klus. Et verhael is wat uutgebreider maekt mit meer meensken die d’r in veurkommen. Et zal een kotte film van ongeveer 30 tot 40 menuten wodden. As… d’r geld veur komt en d’r akteurs en aktrices te vienen binnen die goed speulen en goed Stellingwarfs praoten kunnen. Et zol een mooi kedo wezen veur mien tachtigste verjaordag. Steven de Jong het de karke van Hooltwoolde kocht. De kommende zundagmiddag wodt de Filmkarke van Steven daor eupend deur aktrice Tatum Dagelet, zanger Syb van der Ploeg en de kiender van Steven. Ik hebbe een uutneudiging om d’r bi’j te wezen.