Burgemeester André van de Nadort

Ik vien et slimme spietig dat oonze burgemeester van West-Stellingwarf, André van de Nadort, votgaot. Et is een butengewoon aorige en goeie burgemeester en ie moe’n altied mar ofwaachten waj’ d’r veur in de plak kriegen. Hi’j wodt waornemend burgemeester in Waadhoeke omdat de burgemeester daor slim ziek is. Daor wodt trouwens ok een mooie minderhiedstael praot: et Bildts. Ik hebbe riegelmaotig kontakt mit de burgemeester had, omdat ik twie keer in et jaor verhaelen vertellen moch veur ni’je inkommelingen. Dan leidde hi’j mi’j altied in. Tiedens de corona gebeurde dat vanzels niet, mar we hadden wel kontakt. Op 29 meert 2021, dat is morgen al weer vier jaor leden, wodde ik ereburger van West-Stellingwarf. Dat was een bi’jienkomst mit de raodsleden op ofstaand en op beeldscharms te zien. Ik vertelde allienig in een kaemertien in et gemientehuus doe een verhael wat ze via die beeldscharms volgen konnen. En doe ‘k uutverteld was kwam de burgemeester d’r in mit een grote bos bloemen en vertelde me dat de raod me benuumd hadde tot ereburger. Een enorme ere! D’r weren mar een stokmennig meensken in et gemientehuus die et mitmaeken mochten. Ok in coronatied kreeg in de Zulveren Anjer en kwam de burgemeester mit Kommesaores Arno Brok bi’j me an de deure mit ok al een grote bos bloemen. Ze mochten niet bi’j me in huus kommen vanwege corona. Dat weren mooie gebeurtenissen. Doe mien petret in et gemientehuus onthuld wodde mochten d’r gelokkig wel meensken bi’j wezen. De burgemeester zal grif mien gedicht Schoelplak, dat ik op verzuuk van de gemiente schreef in verbaand mit de herdaenking van de waetersnoodramp van 1825, niet licht vergeten. Ik hebbe begrepen dat ultrarechts d’r niet echt bliede mit was. Dat hoeft ok hielemaole niet. Et is trouwens ien van de mooiste gedichten die ‘k ooit schreven hebbe. Ik hope dat et André van de Nadort boven in Frieslaand goed bevalen zal. Hieronder een foto die maekt is op 29 meert 2021 doe ik ereburger wodde.