Brummels

Ik hebbe et boek Bij de bramen langs lezen. Et boek is een initiatief van Brommels! Dat is et jaorlikse brummelfestijn dat in de Friese Woolden hullen wodt. Et is een prachtig uutvoerd boek en ie kun d’r van alles in vienen over brummels. Wussen jim dat d’r in Nederlaand ongeveer twiehonderd soorten brummels veurkommen? D’r staon netuurlik recepten in hoe aj’ brummelsjem, -keek en -wien maeken moeten. Mar ie lezen ok van alles over de Fryske Wâlden. Hoe et laandschop ontstaon is, de boswallen. Et gaot over bomen, plaanten en dieren die daor veurkommen. D’r staon ok een stokmennig volksverhaelen in et boek die indertied bi’j mekeer gadderd binnen deur de bekende Dam Jaarsma. Die man warkte ok veur et slim bekende Bureau van J.J. Voskuil oftewel et Meertensinstituut. in Amsterdam. Voskuil kwam wel mit trein en fiets bi’j him op warkbezuuk. Lees de serie Het Bureau! D’r kommen trouwens een protte volksverhaelen in die streek van Frieslaand veur. Et is al mit al een riek boek! Et aorige is dat in de Woolden et woord brommels bruukt wodt. In et Fries wodt meerstal et woord toarnbeien bruukt. In de Stellingwarven komt et woord brommels ok veur in plak van brummels. Wi’j hadden vroeger een jachthond die Flora hiette. Dat was mien speulkammeraotien. Hi’j paste ok goed op me. Hi’j leup altied an de slootskaant zodat ik as kiend niet in et waeter valen kon. Flora was gek op brummels. Ik zie him nog bi’j een brummelpolle staon te eten. In Ni’jhooltpae het brummel trouwens nog een aandere aorige betekenis. Awwe et in Ni’jhooltpae hebben over een lekkere, dikke brummel dan hewwe et over een mooie jongemeid! Kennen ze zokke brummels in de aandere Stellingwarver dörpen ok?