Brummels plokken

Dit dagboek is wel slim bi’j de tied. Gister hier andacht veur et Jacobskruuskruud en vandaege een groot artikel van Jantien de Boer over die mooie en nuttige plaante in de Liwwadder Kraante.

Ik hebbe vandaege een fietstocht van 43 kilemeter maekt. Ik fietse op et ogenblik even liever allienig, dat is minder drok. Bi’j de Lende langes bin ‘k naor de Driewegsluus gaon en doe naor de theetuun bi’j de Scheenesluus. Ik was daor te vroeg, dat ik hebbe daor eerst een fluttien dikke zwatte brummels plokt. Ik was nog mar krek an ’t plokken doe iene mien naeme aachter me zee. Een mit mi’j vergeleken jonge kerel op een reesfiets. Et was een zeune van Alie en Wopke uut Kootstertille. Hi’j woont in Noordwoolde en zol over De Lemmer naor Urk. Daor een herinkien behaffelen en dan weer naor de Stellingwarven. Ik wol dat ik dat nog kon. We hebben mekeer daor al eerder troffen, doe zol hi’j op ‘e fiets naor Harlingen of zo. Ik hebbe zegd dat hi’j zien vader en moeder de groeten doen mos. Alie en Wopke zullen dit misschien wel lezen en weten dat now dus. As hi’j de groeten niet dot moe’n ze him vanzels op et mattien roepen. Ik hebbe wat drinken en een panini in de theetuun had, wodde herkend deur meensken uut Wolvege wiels ik een brille en pettien op hadde, en bin doe over Ooldetriene en Sunnege weer naor huus gaon.

Ik kreeg een kaorte van Jarina. Die was in Liwwadden naor de tentoonstelling van wark van Bauke de Vries in keramiekmuseum Princessehof. Op ‘e kaorte Majesteit van Bauke de Vries uut 2024, Willem-Alexander en Maxima.