Brugge

Ik bin vandemorgen naor fysiosport in Wolvege west. Ik hadde graeg op ‘e fiets wild, mar et regende, en ik laote me vanzels niet nat regenen. Mar… ankem weke wodt et prachtig zoemerweer en dan bin ik mit Jelle een midweke vot. Dat zuwwe treffen! Nao de fysio hewwe as groepien even genoeglik bi’j mekeer zeten mit wat drinken en wat lekkers d’r bi’j. Margriet trakteerde omdat ze 45 jaor trouwd was mit dezelde man. Dat is wel een traktaosie weerd. Et is gezellig om zoks te doen. Katrien dee et doe ze 85 wodde en ik hebbe trakteerd doe ‘k 80 wodde.

Ik kreeg een kaorte toestuurd van Saakje en Bennie vanuut Brugge. Saakje schrift dat ze daor een protte bekeken hebben en dat ze doodmu wodden is. Brugge is vanzels een prachtige stad. Ik bin d’r ien keer west. Mit kammeraod Haarm he’k op 28 juli 1977 mit een bus van reisburo Blok een dagtocht naor Brugge maekt. We stapten in Wolvege op et Kolksplein in en uut de bus. In Brugge hewwe doe een hiele mooie boottocht deur de grachten maekt. Ik wete et nog best en et is werachtig al zowat 49 jaor leden…