Brokeback Mountain

Ik hebbe et boek Brokeback Mountain en andere verhalen van Annie Proulx lezen. Brokeback Mountain is vanzels een hiel bekend verhael en et is in 2005 verfilmd. Ik hadde de film al wel een peer keer zien en now he’k et verhael dus lezen. Een verhael over Ennis en Jack die nog gien twintig binnen as ze tegere op ‘e roege hellings van Brokeback Mountain een grote koppel schaopen huden gaon. Die zoemer wo’n ze verliefd op mekeer en die passie blift. Ok as ze laeter elk een huusholing hebben zien ze mekeer zo now en dan. Meer zit d’r niet in. Et verhael lopt uuteindelik niet goed of… Vusen te vule meensken bin kotzichtig en zitten vol veuroordielen. Dat wodt d’r in disse wereld niet beter op. D’r staon meer Wyomingverhaelen in dit boek. Verhaelen over stoere kerels in een roege en hadde wereld. Boeren, arbeiders, vrouwluden, rodeorieders… Waarme zoemers, koolde winters. Verhaelen mit draank en seks. Zoas et echte leven is. Meensken die van slim nette streekromans holen daor de kiender kommen zonder dat d’r ooit spraoke van seks west het, kun disse verhaelen beter mar niet lezen. De schok zol te groot wezen. Mar ik vun ze mooi.