Broeksterwâld

Vandemiddag he’k verhaelen verteld veur 20 leden van de kristelike plattelaansvrouwluden van  Broeksterwâld oftewel Broeksterwoolde in dörpshuus De Pipegael. Ik was ien keer eerder bi’j heur west en dat was 28 jaor leden, op 27 meert 1995. Et zal me grif niet lokken en gao over 28 jaor nog een keer naor heur toe. De verieninge hoolt trouwens op te bestaon. Die ok al! In april vieren ze et 65 jaorig bestaon nog mit een broodmaoltied en dan is et gebeurd.. D’r wil gieniene meer in et bestuur. Wat gaot d’r zo een protte verleuren. Et was trouwens een prachtige middag We bin uut aende zet mit et zingen van gezang 351: Zie ons heden voor U treden...  En daornao he’k heerlik vertellen kund. De beheerder van et dörpshuus vreug a’k wat mit de vrouwluden wodden kon. Ikke wel!

Nog even over gistermiddag in Linde. Ik hebbe een stomme fout maekt. Et ni’je boek van Jan Veenstra is uutgeven bi’j uutgeveri’je Passage in Grunningen en niet bi’j Balans. Vanwege de reboelie in de Drentse Letteren wa’k een betien schoftig en gao die kaant uut. Ik was al haost bange dat ze mekeer lichtkaans mit hujvörken naozitten zollen, mar dat was niet zo. Ik hebbe begrepen dat et Drents letterkundig tiedschrift Roet Drents blift. Et wodt gien Nedersaksisch letterkundig tiedschrift. Dat is vermoedelik ok wel zo verstaandig. Et is in et verleden twie keer perbeerd en hool een Nedersaksisch tiedschrift overaende en dat is beide keren niet lokt.