Brodsig weer

Et was een brodsige dag mit een oplopende temperetuur naor 29 graoden. Daor mos dus wel dallie op kommen. Ik hebbe eerst nog 55 kilemeter fietst. Eerst he’k vandemorgen in Wolvege naor fysiosport west en daornao bin ‘k bi’j de Lende langes deurfietst naor de Driewegsluus en van daor bin ‘k naor Ooldemark reden. Daor he’k op et prachtig verni’jde terras van Family wat drinken en een twaelfuurtien had. Over Blesdieke bin ‘k weer naor huus toe gaon. Doe ‘k even thuus west hadde, bin ‘k weer op ‘e fiets stapt en naor de kezeboerderi’je in Berkoop gaon om daor wat lekkers te kopen. Dat lekkers neem ik morgen mit naor Twente. Eindelik za’k es weer naor et wondermooie Twente. Ik was krek weer thuus doe de eerste rommelschore over oons hennekwam, laeter wodde et nog pittiger en kwam d’r een bratse regen. Daor hawwe trouwens wel verlet van. Hieronder nog een foto die ‘k maekt hebbe doe de zunne al zowat votkreupen was. Op ien van de ni’je verhoogde broggies in et Lendepad he’k de foto maekt. Overal hebben ze oolde kronkels van de Lende opni’j uutgreuven. Dat is goed wark!