Brieven an Sibbeltien

Mit grote interesse he’k et boek Jannes de Oostganger – Brieven an Sibbeltien lezen. Een boek dat schreven/saemensteld is deur Henk Bloemhoff en Otto de Vent. Et gaot over et Batteljon Frieslaand (1945-1948). Et Batteljon beston uut vri’jwilligers die, naodat wi’j hier oonze vri’jhied weerommekregen hadden, naor de Oost gongen mit de bedoeling om de meensken daor te helpen. Friezen, Stellingwarvers, Twenten en goenend uut aandere patten van et laand. Ien van de Stellingwarvers schreef een soortement kollums in briefvorm en in et Stellingwarfs in et batteljonsblad. Brieven an zien maegien Sibbeltien in Huttenbarg, in de buurt van Willemsoord. De brieven wodden ondertekend deur Jannes de Oostganger. Mar wie was dat en wat veur soort Stellingwarfs schreef hi’j? De schrievers hebben perbeerd om dat allegeer op te helderen. Ze hebben mit tal van naobestaonden praot, mar et is niet lokt om an de weet te kommen wie him verstopte aachter de naeme Jannes de Oostganger. Et is vanzels ok niet zeker as d’r ooit een Sibbeltien bestaon het. Hi’j kan ok wel een maegien en een naeme bedocht hebben. Zeg et mar. Et raodsel zal lichtkaans nooit oplost wodden, mar de Stellingwarver schrieveri’je is deur de ontdekking van disse brieven wel rieker en uutgebreider wodden. Alle stokkies in briefvorm staon in et boek ofdrokt in de spelling die Jannes bruukte en in de spelling zoas we die vandaege-de-dag bruken. D’r wodt in et boek ok rejaol ommedaenken geven an et Batteljon Frieslaand en de toestaand in Nederlaans-Indië in die jaoren. Indië mos in wat veur saemenwarkingsverbaand dan ok bi’j Nederlaand blieven. Indië verloren, rampspoed geboren was een bekende leuze, mar de oorlog en et kloniaole systeem weren niet vol te holen. Op 27 december 1949 tekende keuninginne Juliana de akte van de soevereiniteitsoverdracht in et Peleis op ‘e Dam in Amsterdam. Wat zol et mooi wezen as meensken deur et lezen van dit boek toch nog mit de oplossing kommen zollen. Dawwe dan toch nog te weten kommen wie Jannes de Oostganger was en as die echt verkering hadde mit een Sibbeltien uut Huttenbarg bi’j Willemsoord.