Johan Veenstra
Stellingwarver schriever en verteller

Brieven an Annette

Plaetst op 18 oktober 2026.

Ik hebbe et boek Chere Annette van de Kannedese hooglerer-historikus perfester S.W. (Toby) Jackman lezen. Een mooi boek veur meensken die van geschiedenis holen. In et boek staon de brieven die tsarina Maria Fjodorovna (1759-1828) stuurde an heur dochter Anna Paulowna (1795-1865). Anna trouwde mit de preens van Oranje, oonze laetere keuning Willem II. Ze verhuusde van de grote en rieke Romanov-peleizen in Ruslaand naor de vule kleinere en ienvooldiger Oranjepeleizen in Nederlaand. Anna raekte zodoende een aende van huus. Ie konnen in die tied reizen mit koetsen of mit de boot en weren in beide gevallen lange onderweg. En om kontakt te holen wodden d’r brieven schreven. Een hieleboel brieven. Maria Fjodorovna schreef heur dochter elke dag. Lange brieven en hiele kotte briefies. Kindlief en Annette-lief… En Anna schreef weeromme an heur moeder en heur breurs. In et boek staon de brieven van 1820-1828. De laeste jaoren van tsaar Alexander I en de eerste jaoren van tsaar Nicolaas I. De moeder perbeerde de dochter in heur brieven veur te bereiden en wieze lessen te geven veur de tied as heur man keuning en zi’j keuninginne wodden zol. Netuurlik schreven ze over de poletiek en de politici van die daegen, mar ok over de gebeurlike dingen van alledag. Wat d’r in de femilie allegeer te redden was. Wie d’r ziek was en weer beter of… niet beter wodde. Al lezende pruuf ie altied de genegenhied die ze veur mekeer hadden.