Brands

Et was vandaege mal weer. Eerst gries en motterig en laeter roezebroekerig. Mar… de museums bin weer los. We bin vandaege naor Ni’j Dordrecht west, dat is in de buurt van Emmen. Daor hewwe Museum Collectie Brands bekeken. Hiel butengewoon! We hebben d’r eerst een film over Brands bekeken en wat dronken in et museumresteraant. De Collectie Brands is et levenswark van mar iene man: Jans Brands. Hi’j het zien leven laank van alderhaande spul bi’j mekeer gadderd. Meer as honderdduzend dingen! Op veilings en rommelmarken sleug hi’j zien slag en hi’j zat op et laeste in een boerderi’je die tjokvol spul ston. Munten, pennings, oold ark, gewichten, boeken, zeldzeme geschriften uut de Middelieuwen, serviesgoed en alderhaande spul uut grootmoeder heur tied. Twie jaor leden is Brands wegraekt. Daorveur al is d’r een groot stok bi’j de boerderi’je anbouwd veur et museum. De kaemers in de boerderi’je daor Brands in woonde, hebben ze zo laoten. Et is een feest van herkenning! Hebben jim ooit wel es kleine kenonskoegelties zien die bruukt binnen tiedens de Slag bi’j Heiligerlee? Jim kun et daor bekieken! Et is onveurstelber zovule as die man bi’j mekeer verzaemeld het. En wat mooi dat dat now in een museum te bekieken is! Mit een gids hewwe alles bekeken! De resteraants bin trouwens ok weer los, dat we hebben zokrek lekker eten had bi’j Van der Valk in Wolvege!
D’r kwammen reakties van drie lezeressen van dit dagboek angaonde de foto van poes Marja. Wat een mooie foto en wat staot poes d’r mooi op! Ik vertelle hier niks van an poes. Dan vuult et diertien him nog veurnaemer. Hi’j kan best allienig deur et loekien in en uut et huus gaon, mar hi’j gaot altied toch eerst nog bi’j de deure zitten en verwaacht dat ik him d’r persoonlik in- en uutlaot. Ik bin bi’j him in dienst. Zo vuult dat niet allienig, zo is et ok!