Bosschoppen

Ik hebbe vandemorgen een flut bosschoppen in huus haeld, want ik kriege morgen eters. En die eters zetten d’r vaeke nogal een protte deur, dat zodoende da’k een auto vol ophaeld hebbe. In de supermark zat een vrouw een bekertien koffie te drinken. Ze reup mien naeme en ik mos even bi’j heur zitten gaon. Ik kende heur niet, zi’j mi’j dus wel. Ze hadde me jaoren leden al es verhaelen vertellen heurd in gebouw De Ark veur meensken van de karke. Ze vertelde dat heur vrund wegraekt was en dat ze now een ni’jen iene hadde. Ze kon niet zonder man. Daor is ze trouwens niet de ienige in. Doe ‘k weer thuus was he’k alvast een panne gruuntesop mit ballegies kookt en ik hebbe een botterkoeke bakt mit een vulling van welde abrikozen. Dat et volk kan morgen mar kommen, ik bin d’r wel klaor veur. Ik hope wel dat ze laeter helpen te ofwasken.