Boottocht

Gisteraovend was dan et laeste pat van de boottocht van André van Duin en Janny van der Heijden bi’j de elf Friese steden langes op ‘e tillevisie. De perveensie Frieslaand het et pergramme sponserd mit een kleine dattigduzend euro. Dat laeste pat was trouwens een feest van herkenning. Die hiele route hebben wi’j ok haost wel veerd. Netuurlik ken ik zodoende et bekende broggien van Bartlehiem. Ik bin d’r trouwens ok wel es overfietst! En dan de meule van Burdaard en even veerderop de grote brogge daor we onderdeur veerd binnen. Dat kleine broggien in Aldtsjerk bin we ok vaeke onderdeur veerd, mar dan mos de kappe van de boot wel naor beneden en de vlagge mos zolange inhaeld wodden. En dan de tegeltiesbrogge en de Bonkevaort. Prachtig om et allemaole ok es op disse meniere te zien. En veerder… was et een protte nep. Die stuurkeunst van André van Duin heb ik op een piepvol. Die man hadde de hanen bi’jtieden hielemaole niet goed an et stuur en dan keek hi’j alle kaanten op en praotte drok mit Janny over poeiermelk of siepelsop. Aj’ op die meniere sturen, zit ie rap mit de kop van de boot in de wal. Neem dat mar van mi’j an. En zol Janny van dat maol eerpels uut Dokkum echt zels stamppot mit spekkies en wost maekt hebben? Of zol dat spul onderwegens kaant en klaor an boord ofleverd wezen?
Doe ‘k vandemorgen de deure losdee, roffelde d’r een specht in de bos naost huus. Een prachtig geluud! Ik bin naor Marian in Wolvege veur fysio west. Et zol aenlik veur de laeste keer west hebben, mar ik hebbe sund een dag of tiene dudelik weer meer last van burn-out klachten, dat we gaon nog even deur mit de fysio. As jim nog es fysio hebben moeten… Marian Hogeling an de Stienwiekerweg is ommeraek goed in heur wark en ze is nog aorig ok! Een best adres dus! Veur disse reklame krieg ik gien geld!