Boottocht naor De Jouwer

Vandemorgen om half negen wa’k al bi’j Fettje in Noordwoolde. Die is bi’j me in de auto stapt en we bin doe naor Eernewoolde reden. We hadden oons opgeven veur een boottocht van rederi’je Princenhof. Een dagtocht naor De Jouwer. Om half tiene biwwe mit een kleine veertig meensken an boord gaon van de Wetterprinses. Et is mi’j daor allemaole hiel bekend. We veerden via Grou en Ooldeschouw over et Sneekermeer en doe deur de Jouster Sluus en via Broek naor De Jouwer. Onderweg kregen we eerst twie bakkies drinken mit een tippe oranjekoeke en om et middagure henne een koppien tomatesoep mit ballegies, een boltien mit keze en een boltien mit een kroket. Van ongeveer ien ure tot half drieje mochten we De Jouwer in. We hebben twie gebouwen van et Museum Joure bekeken en bin doe weerommegaon naor de boot. Op ‘e weerommereize kregen we nog twie waarme happies. Netuurlik konnen we zat drinken bi’jbestellen. Om zes ure wawwe weeromme in Eernewoolde nao een mooie dag. Et weer vul honderd percent mit. Op ‘e Jouwer was et zunnig, zuver wat stikkerig en 19 graoden. Onderwegens weeromme kregen we een beste bujje bi’j Grou. We hebben zokrek lekker waarm eten had in et resteraant bi’j de Koepelbos in Berkoop. Allebeide heerlike zalmfilet. Hieronder twie foto’s. Boven: gezicht vanof de boot op Grou. Onder: ien van de gebouwen van Museum Joure.