Boottocht (9)

Et is vandaege 25 jaor leden dat preenses Diana verongelokte. Ik wete nog percies waor a’k was doe ‘k dat bericht heurde. Ik lag op bedde en zette de radio an veur et ni’js van elf ure en dan et pergramme Mit et oge op morgen. En doe kwam die vreselike tiedinge. Veur altied zie ‘k de beelden van de begraffenis veur me. Die beide joongies lopende aachter de kiste mit heur moeder en bekeken deur miljoenen meensken over de hiele wereld. Vreselik! De traonen scheuten me doe in de ogen en dat gebeurde weer doe Elton John Goodbye Englands rose zong. En dan die flitsen van al die mannen en vrouwen die butendeure bi’j de route langes stonnen te goelen. Dat is allemaole al weer 25 jaor leden.

We bin vandaege de hiele dag weer op et waeter west, van vandemorgen kwat over tiene tot vanaovend goed kwat over zesse. Et was een mooie dag, mar d’r ston een best stok wiend. Dat is trouwens wel lekker. We bin deur Wartena veerd en doe hewwe in de buurt van Eernewoolde en De Veenhoop ommezwurven. We hebben tussen drie en vier ure eten op et terras van hotel-resteraant Princenhof. Dit kan mar zo de laeste boottocht van dit zoemerseizoen west hebben. Dat maekt me altied wat mankeliek. Weer een zoemer die haost veurbi’j is. Ik kriege d’r een last rose of summer-gevuul van. Hieronder een foto die ‘k vandemiddag maekt hebbe. Wat een mooie boot!