Boottocht (7)

Wat was et vandaege een heerlike dag op et waeter! Van tien ure vandemorgen tot kwat veur zesse vanaovend biwwe mit de boot onderweg west. Krek as twie weken leden biwwe eerst naor de Fonejacht-brogge veerd en doe et Preenses Margrietkenaal uut bi’j Burgum langes naor et Burgumermeer. Veertien daegen leden biwwe daor naor et noorden gaon in de richting van De Westereen. Now biwwe over et meer et zuudoosten inveerd. Over de Lits naor Oostermeer.  In dat dörp he’k zo deur de jaoren henne acht keer optreden mit verhaelen uut eigen wark. Ik hebbe et krek even naokeken. Uut dat dörp kommen de zusters Kroes die de schaopies meer as op et dreuge kregen hebben deur mooi te wezen, medellewark, recepten en kookboeken. Mit et schrieven van boekies in et Stellingwarfs hael ie de buit vanzels niet binnen. Ik hadde vanzels wiezer wezen moeten… We bin veerderveerd naor et mooie meer De Leyen bi’j De Rottevalle. Daor staot een mooi paviljoen an et waeter. We hebben daor in de stromende regen al es wat eten. En dat was gien sukses. Alles wat waarm wezen mos was lauw. Mit Douwe he’k d’r trouwens wel es lekker eten. We hebben d’r now dus niet anlegd. We bin weerommeveerd naor et Burgumermeer en krek as twie weken leden hewwe heerlik eten in et resteraant op vekaansiepark Klein Zwitserlaand. Ik hebbe weer een brotien mit rookte zalm had en we wodden weer bediend deur et maegien dat Engels praotte. Hieronder een foto die ‘k vanof de boot maekt hebbe doe we deur Oostermeer veerden.