Boottocht (5)

We bin de hiele lange dag mit de boot op et waeter west, van vandemorgen veur tien ure tot vanaovend nao half zeuven. Een prachtige dag! Wat was et heerlik weer! We bin eerst naor de Fonejacht-brogge veerd en doe et Preenses Margrietkenaal uut, bi’j Burgum langes, naor et Burgumermeer. Van daor de Kuukhornster Vaort uut, bi’j Kuukhorne langes naor De Westereen. Die streek was vroeger vanzels een slim aarme streek. De Burgumer Heide mit al die plaggehutten… En now… Mien hemel nog an toe, wat staon d’r mooie huzen an et waeter op ‘e Westereen. Zie de foto hieronder die ‘k vandemiddag maekt hebbe. Now woont de elite daor, zo te zien. Mien slim wardeerde webmaster woont daor ok. Hi’j is ok de webmaster van een aandere slim beroemde schriever. Zol hi’j soms ok in zoe’n huus wonen? Et hoeft je niks te verbaozen! Van De Westereen biwwe weer naor et Burgumer Meer gaon en daor hewwe om twie ure anlegd bi’j rekreaosiepark Klein Zwitserlaand. Wat is et daor mooi! Et resteraant staot op een hoogte. Vanof et terras kiek ie prachtig uut over et meer. Ien van de maegies die bediende kon allienig mar Engels praoten en verstaon. Mar och, mit et ulo-Engels van meneer Stedehouder kom ie de hiele wereld over! We hebben daor heerlik eten. Ik hadde een boltien mit rookte zalm. Superlekker. Wat een lekker knapperig brood! Nao de eteri’je biwwe et Margrietkenaal weer uutveerd en we bin deur Wartena en bi’j Warstiens langes weer op et noorden anzet. Een dag mit een goolden raantien!