Boottocht (2)

Vandemorgen ston d’r een kollum van me in de Liwwadder Kraante betreffende et 50-jaorig bestaon van de Stellingwarver Schrieversronte. Een kollum mit een wat wonder begin. Dat was mien fout niet. Bi’j de kraante hebben ze een verzin maekt en de eerste twie regels van de kollum bin daor te zuke raekt. Hiel vervelend.

De langste dag van et jaor was een prachtige zoemerdag! We hebben vandaege weer een heerlike boottocht maekt van tien ure vandemorgen tot zes ure vandemiddag. We bin eerst deur Warga veerd en doe naor Grou. Vandaor naor De Veenhoop en we bin een tippien de kaant van Drachten op west. Doe weeromme en doe hewwe wat bi’j Eernewoolde ommeveerd. Om kwat over drieje hewwe anlegd bi’j hotel Princenhof. Op et terras hewwe heerlik eten en drinken had. Ik hebbe een Driemaster had. Zo hiette dat a’k et me goed herinnere. Een soortement twaelfuurtien: een koppien bloemkool-broccolisop, een plakkien bolle mit een kroket, een plakkien bolle mit schinke en een bakt ei en wat eerpelsalade. Hiel lekker! We bin nao et eten naor et noorden veerd over Wartena en bi’j Warstiens langes. En jim kun et geleuven of niet, mar we hadden op een gegeven ogenblik een moes an boord. Een moes! We bin gelokkig niet mit man en moes vergaon! Hieronder een foto die ‘k vandemorgen maekt hebbe. Gezicht vanuut de boot op Grou.