Boottocht

De zunne was d’r vandaege zowat niet bi’j, mar de temperetuur leup op naor zoe’n 25 graoden. Et was dus heerlik weer om op et waeter te wezen. Dat wawwe dan ok: van vandemorgen kwat over tiene tot vandemiddag kwat over zesse. We hebben een peer spatterties had. We bin via de Fonejacht-brogge naor Eernewoolde veerd en daor hewwe weer wat ommekruusd. We hebben tussen 3 en 4 ure eten op et terras van hotel-resteraant Ie-Sicht. Doe was d’r krek een bujgien, dat de regen tikte zachies op oonze parresol en niet op oons zoolderraem zoas indertied bi’j Rob de Nijs. Hielemaole op et aende van de boottocht begon et ok weer wat slimmer te druppen. Mar et was een prachtige dag. De kaans is groot dat dit de laeste boottocht van dit jaor west het. Misschien dat et ankem weke nog een keer kan. Dat zol mooi wezen. Ik wor d’r altied wat mankeliek van as zoe’n zoemerseizoen weer haost veurbi’j is. Ik zag vandaege ok nog wat daor a’k een kollum over schrieven zal. Hieronder een foto die ‘k vandaege maekt hebbe. Jammer dat d’r gien zunne was. Dit is een mooie, smoeke vaort tussen Wartena en Eernewoolde. We veren hier mit twie sloepen veur oons.