Boottocht

Vandemorgen hebben de beide tuunmannen Arnoud en Jaap de tuun hielemaole beredded. Ik kon tussen de middag gien panne soep veur heur klaormaeken, want ik mos vot. Ik hebbe vandemiddag mit Fettje een prachtige boottocht maekt. Ik hebbe heur anhaeld in Noordwoolde en doe biwwe naor Eernewoolde reden. Daor biwwe om goed half 2 an boord gaon van de Marprinses van rederi’je Princenhof mit nog een 60 aandere meensken veur een middagtocht naor Grou. We begonnen mit drinken en oranjegebak. En doe nammen we een veur mi’j hiele bekende route naor Grou. Daor mochten we een ure laank et dörp in. We hebben daor heerlik in de zunne op een baankien zeten. Doe we weer an boord zollen, vreug een vrouw as ze oons tegere op petret zetten zol. Ze vreug mitien as ik Johan Veenstra was. Ja dus. Now, dat hadden heur zuster en zi’j al docht. Ze woonden in Drachten, mar kwammen van Ni’jtriene en praotten Stellingwarfs. Heur grootmoeder hadde toegeliekertied mit mien moeder in et verpleeghuus in Wolvege zeten, een schoffien op ‘e zelde kaemer. Ik was nog op ‘e begraffenis van heur grootmoeder west. Och ja… dat bin vervelende herinnerings. Vervolgens biwwe via een aandere mar mi’j ok hiel bekende route naor De Veenhoop veerd en bi’j resteraant Ie Sicht biwwe linksof gaon, weeromme naor Eernewoolde. We zatten op ‘e boot buten op et dek en kregen drinken en heerlike happies. Om zes ure biwwe weer van boord gaon. Op ‘e weerommereize naor huus hewwe in resteraant Koepelbos in Berkoop lekker waarm eten had. Hieronder twie foto’s die vandemiddag maekt binnen. Boven: de Sunt Pieter Pasteri’je van Grou, tegenover de karke. Onder: Fettje en ik veur de rondveertboot Marprinses. Et was een prachtige middag!