Boottocht

Gister kree’k Egbert en Rieke an de deure. Ze wollen graeg nog een exemplaor van Naozoemerlaand hebben en weren bi’j Zwikstra in Wolvege in de winkel west, mar die hadde gien Stellingwarver boeken meer. Ze hebben daor now opruming veurdat de winkel aanst definitief dichtegaot. Dat is een ramp veur de verkope van Stellingwarver boeken. Naozoemerlaand is in de Stellingwarven allienig nog te koop bi’j Bruna in Oosterwoolde, Primera in Noordwoolde, de Stellingwarver Schrieversronte in Berkoop en bi’j mi’j an huus. As jim et boek nog hebben willen, doe me dan mar even bericht, ik brenge et in de buurt vergees rond. Buten de Stellingwarven is et te koop bi’j Binnert Overdiep in Et Vene, Planteyn op ‘e Gediek, Boekhaandel Burgum in Burgum en in Liwwadden bi’j Van der Velde en de Afûk.

Eindelik kon ik vandaege nao zeuven weken weer es mit de boot mit vot. Van half 11vandemorgen tot 5 ure vandemiddag. Deur alle ziekenhuus-gedoe kon et een schoft niet. Et was een heerlike dag, mar wel waarm! Et was tussen de 30 en 31 graoden. We bin deur Wartena naor Eernewoolde en omstreken veerd. We hebben tussen half 2 en half 3 eten en drinken had op et terras van hotel Ie-Sicht. Weeromme biwwe deur Wartena en et prachtige Goutum veerd. Hieronder een foto die ‘k onderwegens maekt hebbe. Ik hope dat et nog een keer kan, mar et weer kan vanzels ok zomar ommeslaon en dawwe dan inienend dikke in de haast zitten. Laot dit ooldewievezoemertien nog even duren!