Bois du Nord

Eregister he’k een lekkere keek bakt en gistermiddag een donkerbrune Veluwse kruudkoeke mit rezienen. Heerlik! Ik bin dus weer even drok an et bakken. Ik wil aenlik perberen om vandehaast en vandewinter wat fietsen te blieven. Vandemiddag he’k zodoende op ‘e fiets naor de apteek en de supermark in Wolvege west. Et was bi’jtieden wat motterig haastweer. Dat zal een grote overgang wodden veur mien goeie vrunden Harry en Frans. Die zwarven al een maond in Frankriek omme. Ze zatten gister nog in de Pyrenenen. Nog een weke en dat zit de vekaansie van vuuf weken d’r op. Ankem weke om disse tied zitten ze al weer in et lichtkaans slim haastige en ontiederige Noordwoolde. Now ja, ze zullen dan wel van Bois du Nord zeggen. Ze appten me gister nog wat mooie foto’s toe. Dit is et interieur van een mooi en vermoedelik ok slim oold karkien. De braandschilderde raemen bin prachtig. Zo te zien staot et laeste aovendmaol van Christus en zien apostels d’r op. Al hiel rap nao dit gezaemelike maol eten bleken die apostels niet allegeer echte kammeraoden te wezen.