Johan Veenstra
Stellingwarver schriever en verteller

Boekprissentaosie

Plaetst op 12 meert 2023.

Ik bin krek weeromme uut et Drentse laand. Ik hadde een uutneudiging om vandemiddag bi’j de prissentaosie te wezen van De vaalrode vlieger, de ni’je roman van Jan Veenstra. En dat was in de Theaterschure van Marga Kool en Jan Veenstra in Linde. Op ‘e dele en in de stallen van Marga heur oolderlike huus hebben ze een Theaterschure maekt daor riegelmaotig schrievers, dichters en musici optreden in et muzisch kefé Zondags goed. Om de boekprissentaosie henne was een mooi kultureel pergarmme mit zangeresse Lara Boode mit gitarist Gijs Kos, dichter Ton Peters, Roelinda Alkema (akkordeon) en Reinier Havinga (vioele) en de Grunninger schriever Bill Mensema. Marga prissenteerde et pergramme. Et eerste exemplaor van De vaalrode vlieger was veur Jetta Klijnsma, de Kommesaores van de Keuning in Drenthe. Et boek gaot over een vuur, een tuun, een naacht en een dörp in Drenthe. Et is uutgeven bi’j uutgeveri’je Balans in Grunningen. De Theaterschure zat stampvol volk, dat d’r bin een protte boeken verkocht. Ik kende daor nogal wat meensken, dat ik hebbe aldergenoeglikst mit alderhaande volk praot. Marga vreug as ik nao ofloop ok even bleef om wat mit te eten. Heerlike linzesoep. Daor kregen ze in de Biebel slaonde ruzie omme, mar in Linde niet. Lekker Turks brood mit een heerlike vulling en pudding. Dat ik hebbe et me allemaole lekker smaeken laoten!