Boeken

Vandemorgen he’k mien overzicht van verkochte boeken van meie t/m december 2021 ofleverd bi’j de Stellingwarver Schrieversronte in Berkoop. Daor he’k ok gezellig een bakkien thee mitdronken. Deur de corona ha’k ok in 2021 haost gien optredens en juust tiedens mien optredens verkocht ik altied een protte boeken. Ondaanks dat he’k in dat tiedvak van huus uut toch nog veur 2.368,25 euro an boeken verkocht. Dat kwam vanzels veural deur mien laeste boek: de spannende literaire thriller Et liek in de Lende. Dat boek verkocht allemachtige goed en ik kreeg persoonlik ok een boel bestellings en nogal wat meensken kwammen et bi’j me an huus ophaelen. Vandaor toch nog een vri’j groot bedrag! Mit de Eupen Stal en de sutelaktie d’r bi’j he’k in 2021 in mien ientien veur ongeveer tienduzend euro an boeken verkocht veur de Schrieversronte. Dat liekt me veur heur toch een best stok botter in de bri’j! Zo komt Pietertien in de broek! Iederiene die via dit webstee wat bi’j mi’j bestelt (zie rebriek Bestellen) of die hier an huus of tiedens een optreden een boek van me kocht, kan daor now veur mar twie euro et boek In brêge fan glês bi’j kriegen. Dat is de Friese vertaeling van Een brogge van glas. Is dat gien prachtig anbod? Et laeste ressien van die roman doe ‘k op disse meniere van de haand! Ik brenge bestellings in de buurt trouwens ok an huus!

Vandemiddag bin ‘k uut aende zet en doe es weer wat an mien postzegelverzaemeling. Ik wil daor de kommende daegen aenlik flink mit an de gang. En… ik hebbe een superlekkere ontbijtkoeke mit hunning bakt!