Boeken naor Hooltwoolde

Ik bin vandemorgen om half tiene (al weer) op ‘e fiets stapt. Ik hebbe wat boeken van mi’j naor Hooltwoolde brocht. Die bin daor te koop tiedens de tentoonstelling Wonderkamers in et Batavushusien, Heirweg 57. Daor is de galerie van Sigrid Hamelink. Behalven wark van Sigrid is d’r wark te zien van Ton Broekhuis, Mathilde Hemmes en Christiaan Kuitwaard. En d’r bin dus boeken van de dielnemende keunsteners en schrievers uut de streek te koop. Van mi’j liggen daor de boeken Naozoemerlaand en Et liek in de Lende. En ok nog de bundel Laandschop daor gedichten van mi’j in staon bi’j wark van verschillende keunsteners. De tentoonstelling wodt vri’jdagaovend eupend en daor za’k vanzels bi’j wezen. Et is van 25 meie t/m 23 juni, op vri’jdag, zaoterdag en zundag van 13.00 tot 17.00 ure. En op ofspraoke: 06-19308109. Ik hebbe een bakkien thee dronken bi’j Sigrid en Jelly en bin doe naor de mark in Wolvege gaon. Doe ‘k thuuskwam was d’r een berichien van De Jong, mien brilleman, mit de tiedinge da ‘k mien ni’je brille ophaelen kon. Dat ik bin nao et eten weer naor Wolvege fietst. Ik hebbe mien ni’je brille now op, mar wat moet dat wennen. Et is allemaole wat zweverig. Mien hassens moe’n dit in odder maeken, he’k begrepen. Mar aj’ now niet zovule hassens hebben…