Boeken

Ik misse boekhaandel Zwikstra in Wolvege nog altied slim. Steun de kleine boekwinkels, koop daor je boeken, en niet almar op internet. Ik hebbe gister twie boeken besteld bi’j Planteyn op ‘e Gediek en kon ze vandaege al ophaelen. Eerstens de ni’jste roman van de Friese schriever Durk van der Ploeg: De ierde giet troch minskehân teloar. Durk schrift prachtige romans, ik hebbe ze allemaole. En twiedens: Alles voor de reis van Adriaan van Dis. Van Dis hadde 37 jaor laank een relaosie mit Ellen Jens, tot heur wegraeken in 2023. Jens warkte bi’j de tillevisie. Ze regisseerde pergramme’s. Die van Van Dis en die van de man daor ze mit trouwd was: Wim T. Schippers. Ellen Jens hadde twie mannen. Adriaan van Dis mos heur dielen mit een aandere man. Zoks levert vanzels een leven vol hatstocht en zeerte op. Een prachtig thema om over te schrieven.

Ik zag dat bi’j Planteyn nog ien exemplaor van mien roman Et liek in de Lende te koop is. Bi’j mien uutgever, de Stellingwarver Schrieversronte is et boek uutverkocht. In een inkelde boekwinkel is dus nog een inkeld exemplaor te koop. Ik hebbe hier thuus nog vier exemplaoren te koop. Wie et boek nog hebben wil moet d’r as de wiedeweergao bi’j wezen en me me mar even tiedinge doen. Et wodt niet nog een keer herdrokt. Et is de eerste thriller in et Stellingwarfs en as de aandere Stellingwarver schrievers de hakken niet wat antrekken blift et misschien wel de ienige thriller in et Stellingwarfs. Een uniek boek dus. Et kost mar 15,95 euro, dat is een slieterspriesien.